«Հազար ու մեկ գիշերների» պարուհու կոնքազդրային շարժումների պես դյութիչ, Շահրազադեի հեքիաթների պես ձգող ու Կարմիր ծովի չափ կանչող. Շարմ էլ Շեյխն է՝ զբոսաշրջային ամենահայտնի ուղղություններից մեկը: Այստեղ մարտի 1-ից 8-ը «արևելյան արշավանք» էին իրականացնում նաև հայ լրագրողները. AIR CAIRO ավիաընկերության և նրանց հայաստանյան պաշտոնական ներկայացուցիչ ANRIVA TOUR-ի կազմակերպած ճանաչողական այցը Շարմ էլ Շեյխ էր բերել շուրջ 30 լրագրողների:

  Առաջատար մի շարք լրատվամիջոցների հետ միասին՝ el.am-ը ևս մասնակցում էր այս media trip-ին ու դատարկաձեռն չի վերադարձել. ես  բերել եմ վառ տպավորություններ ու խորհուրդներ, եթե հանկարծ որոշեք այստեղ հանգստանալ, աչքի տակ ունեցեք:
***

     Սա իրոք ճանաչողական և բացահայտումներով լի այց էր՝ սկսած եգիպտական վարքուբարքից մինչև հայկական լրագորողական համայնքի այսչափ համերաշխություն: Բայց ամեն ինչ հերթով և ենթավերնագրերով:
***

Ինչո՞ւ գնալ արևի հետևից

Եթե դուք  թանգարաններ ու պատմամշակութային վայրեր այցելելիս ստանում եք ոչ թե գերագույն հաճույք, այլ գլխացավ, եթե ձեզ պետք է ոչ թե անտառային, այլ ծովային թարմություն և վերջապես, եթե սիրում եք հանգստանալ մինչև վերջին բջիջը, ապա Եգիպտոսն իրոք հարմար, հասանելի և հրաշալի տարբերակ է: Իսկ, եթե արդեն ընտրել եք Շարմ էլ Շեյխը, ապա ինձ մնում է միայն գովել ձեր ճաշակը:

Այստեղ միշտ կարող եք ձեզ յուրահատուկ զգալ՝ թեկուզ միայն հիշելով, որ քաղաքը կառուցված է հենց ձեզ ու ձեզ նման զբոսաշրջիկների համար. ո՛չ մշտական բնակչություն կա, ո՛չ էլ ծեր և խոհուն իմաստուններ՝ ծնունդով Շարմ էլ Շեյխից:

Որպես զբոսաշրջային քաղաք՝ այն հարմարեցված է ամենատարբեր պահանջների և կարիքների տեր մարդկանց՝ խաղատներից մինչև մոլեր, մեծ շուկայից մինչև երեք գծով շարված հյուրանոցներ:

Ձեզ մնում է միայն ընտրել փորձառու տուրօպերատորի և աղաչել աշխարհի բոլոր հավատալիքներին, որ  ուղեկցող զբոսավարը լինի նույնքան խարիզմատիկ և ինֆորմացված, որքան մեր Ահմեդ Աբասն էր:
*

Նրանք, ովքեր առաջին անգամ են այցելում Շարմ էլ Շեյխ, ուղղակի պարտավոր են հիշել 3 կանոն.

1.Հնարավոր չէ ջուր խմել ծորակից, եթե անգամ այն ոսկեզօծ է,

2.Հնարավոր չէ առևտուր անել՝ առանց սակարկելու,

3.Հնարավոր չէ դիմադրել այս քաղաք երկրորդ անգամ այցելու ցանկությանը:

Ջերմություն՝ ոչ միայն արևից

Շարմ էլ Շեյխում օտարերկրացիներին ընդունում են գրկաբաց ու սրտաբաց, մեզ սիրում են և ուզում են, որ վերադառնանք:

Մարդիկ այստեղ ստեղծել են զբոսաշրջային քաղաքի համար անհրաժեշտ ամեն ինչ և անում են ամենը՝ գործը մինչև վերջ իր նպատակին հասցնելու համար: Նրանք սիրում են ձեզ ոչ միայն բաց մաշկի և գեղեցիկ աչքերի համար, այլ նաև  «պրագմատիկ պատճառով»՝ դուք ֆինանսական մուտքի աղբյուր եք, ով հեռանալիս գոհ է, իսկ իրենցից տանում է միայն հաճելի հիշողություններ, նվերներ, ծովային լուսանկարներ և սառնարանի մագնիս. մնացածն իրենցն է ու այստեղ էլ կմնա: Արևելյան պահպանողականության շղարշը կրող այս երկրում տանտերերի հետ ոչ ոք չի կարող մրցել՝ նույնիսկ հաճոյախոսություններ անելու հարցում: Այստեղ կանանց կարող են աստվածացնել անգամ մեկ բառով, և հոգ չէ, որ բառն արտահատվում է վատ ռուսերենով. մենք լավ գիտենք՝ կարևորը վերաբերմունքն է:

Վերաբերմունքից բացի՝ կարևոր է նաև իմանալ

Եգիպտական շուկայում կամ խանութում առևտուր անելը դիվանագիտական բազմաքայլ կոմբինացիա է, որտեղ հաղթողներ և պարտվողներ չկան. ձեզնից յուրաքանչյուրը ստանալու է այն, ինչ ուզում է: Միայն թե՝ հիշեք  2-րդ կանոնը և ներդրեք բանակցություններ վարելու ողջ տաղանդը՝ համեմված լայն ժպիտով և իրենց մշակույթի հանդեպ մեծ հետաքրքությունը չթաքցնելու պարտադիր պայմանով: Բարևեք ու շնորհակալություն ասեք արաբերենով. մեկ «սալամ ալեյքոմն» ու «շուքրանը» կարող են հավանած ապրանքի արժեքը կրկնակի կրճատել:

Տաքսի նստելիս աշխատեք  արժեքի մասին նախօրոք պայմանավորվել, մի քանի տասնյակ ուղտի դիմաց ամուսնության  առաջարկ ստանալիս՝ նեղսրտել մի՛ շտապեք. նախ ճշտեք ուղտի արժեքը, իսկ ինքնագնահատականը կբարձրանա կամաց-կամաց:

Շարմ էլ Շեյխում կարող են համատեղվել ձեր՝ հանգստի հանդեպ ունեցած և՛ ակտիվ, և՛ պասիվ պահանջները: Գիշերային կյանքի սիրահարներին գրկաբաց կընդունեն օրինակ՝«Թաջ Մահալ» ակումբում ու «Հազար ու մեկ գիշեր» ժամանցի վայրում. առաջինում կարող եք ինքնամոռաց պարել, երկրորդում՝ անմոռանալի շոու դիտել՝ համեմված արևելյան շքեղությամբ: «Մշակութային շոկ» չապրելու համար զգուշացնում եմ՝ այստեղ պորտապարը միայն կանանց մենաշնորհը չէ, ավելին՝ սովորեցնողը տղամարդ է:

Մեր ուղևորության ծրագրի ամենաէքստրեմալ ուղղություններից մեկն անցնում էր անապատային փոշու միջով, մյուսը՝ ծովի հատակում. սաֆարի տուրի ժամանակ ու Կարմիր ծովը սուզվելիս աշխատեք վախերը և անհանգստությունները մի կողմ դնել. դրանք միայն խանգարելու են:

Ի՞նչ տեսնել, ու՞ր գնալ

Հենց այս հարցը ծագի ձեր գլխում, կհասկանաք՝ որքան կարևոր է տարածքին ու տեղանքին ծանոթ զբոսավարը: Շարմ էլ Շեյխը  պատմամշակութային կոթողների քաղաք չէ (և բնական է), բայց սա չի նշանակում, որ տեսնելու քիչ բան կա: Եթե ձեզ հաջողվի կտրվել Կարմիր ծովում լողալու հաճույքից, ապա գնալու տեղ միշտ կգտնեք:

ANRIVA TOUR-ի կազմակերպած ուղևորության ընթացքում մենք հասցրինք լինել քաղաքի ամենաշքեղ մզկիթներում, Ղպտի ուղղափառ եկեղեցում, մեկօրյա զբոսանք ունենալ «Fantazia Cruize» նավով  և վերջապես՝ լինել զբոսնելու համար ամենաանվտանգ և հաճելի վայրերից մեկում՝ Սոհո հրապարակում: Սրան գումարեք նաև քաղաքային փոքրիկ սրճարաններն ու ժամանցի վայրերը, որտեղ  երեկոները կարելի է վայելել արևելյան սուրճ կամ թեյ ու ֆուտբոլ դիտել՝ եգիպտացի մեկնաբանների կրակոտ արձագանքներից մեկումեջ վեր թռչելով:

Ժամանցը կազմակերպելու հարցում ձեզ կօգնի նաև նախընտրած հյուրանոցի ադմինիստրացիան. մեր այցելած  գրեթե բոլոր հյուրանոցներում («Barcelo Tiran», «Savoy», «Reef Oasis Blue Bay») ամեն երեկո կազմակերպվում էին ժամանցային միջոցառումներ կամ խաղ-մրցույթներ:

Իհարկե, չեմ զարմացնի, եթե ասեմ, որ հայ լրագրողները ոչ մի մրցույթից պարտված դուրս չեկան. «կարևորը մասնակցությունն է» օլիմպիական կարգախոսը մրցակիցների համար էր:

PS. Շարմ էլ Շեյխի մասին բոլոր պատկերացումներն ու ընդահնրացումներն արված են միայն այս ուղևորությունից ստացած տպավորություններից: